Poulou Jaunaren adierazpenen ondotik, BATERA plataformak zenbait puntu argitu nahi ditu :

 

· Asanbladan iragaten ari den Lurralde Elkargoen erreformari buruzko eztabaidaren baitan, 6. hautes-barrutiko diputatu Poulou Jaunak Euskal Herriko hainbat herritar eta hautetsiren kezka azpimarratu du, hots operazio eta politika publiko batzuen kontratazioa ahalbidetu duten tresna eta prozeduren desagerpena.

 

· Arrangura hori BATERA plataformarena ere bada. Eta Plataformaren ustez, eskumen propioak dituen eta herritarrek zuzenki bozkaz hautatu Lurralde Elkargo baten sortzea da aterabide koherente eta eraginkor bakarra. Bestalde, azpimarra dezagun aterabide honekin Hautetsien Kontseiluak eta Garapen Kontseiluak ere bat egiten dutela, 2009ko otsailean Balladur Jaunari egin proposamenetariko bat baita.

 

· Horrek ez du deus ikustekorik herriek, Departamenduak edota Eskualdeak, hala nahi izanez gero, gaur egun indarrean den legearekin jadanik sor lezaketen bainan “mila-hosto” horri beste geruza bat gehituko liokeen sindikatu anitza bezalako dispositibo pisuarekin.

 

· Zurrumurru hori Poulou Jaunak Parisen irabazitako bataila politiko baten ondorioa dela erratea gezurra litzateke. Bestalde, Alain Marleix Jaunarekin Asanbladako pasabideetan egin solas batzuk ez dira inondik ere Euskal Herriko herritarrek behin baino gehiagotan Iparraldearentzat galdetu ezagupen instituzionalaren erantzunez Estatuak ematen duen erantzun politikotzat hartzen ahal. Eta are gutiago kontutan hartzen badugu sindikatu anitz bat sortzeko ahalmena Tokiko Elkargoek dutela, eta ez Estatuak.

 

· Jadanik aski korapilatsua den eztabaida horrek ez du nahasketa handiagoa ekarriko liokeen elementuren beharrik. 14 eta 21eko kontsultan parte hartuz milaka eta milaka herritarrek eman dioten mandatuak azkarturik, BATERA plataformak Lurralde Elkargo baten sortzerako prozesu politiko baten beharraz azalpen eta gizarteratze lana segitzen du. Ondoko asteetan berriz komunikatuko du, tokiko egitura eta arduradun politiko anitzekin bildu ondoren.

 

        2010eko maiatzaren 28a
         BATERA

 

«Sindikatu Misto batek ez du ezer ikustekorik Lurralde Elkargo batekin»

«Daniel Poulouk hainbat herritar eta hautetsien kezka azpimarratu du, eta arrangura hau Batera plataformarena da ere. Berresten dugu eskumen propioak dituen eta herritarrek zuzenki bozkaz hautatu Lurralde Elkargo baten sortzea dela aterabide koherente eta eraginkor bakarra. Sindikatu Misto egiturarekin ez du ezer ikustekorik! Parisen bataila politiko bat irabazia izan dela erratea gezurra litzateke. Jadanik aski korapilatsua den eztabaida horrek ez du nahasketa handiagoa ekar liokeen elementurik behar. Batera-k Lurralde Elkargo baten sortzerako prozesu politiko baten beharraz azalpen eta gizarteratze lana segituko du».

«Ipar Euskal Herriarentzat ez da sasi tresnarik sortu behar »

«Ele biziki ederrak dira baina Daniel Poulou ez da sekulan argiki agertu Batera-k eraman dinamikaren alde. Zinez hori pentsatzen badu, Batera-ren kanpaina sostengatu beharko du, orain egin ez duen bezala. Euskal Herriaren eta euskal herritarren botza entzunarazi nahi badu, gutxiengoa litzateke han izatea. Sindikato Mistoa ez da aukera bakarra, perspektiba arras ezberdinak izan daitezke. Oraingoz ABk bere izenean ez du bat hobesten eta Batera-ren dinamikan lerrokatzen da. Honek etorkizun instituzionalari buruzko kontsulta eskatzen du eta debate hori sortuko denean herritarrek hobetsiko dute instituzio mota bat. Gu ez gara nehor hautatzeko. Dena den, Sindikatu Mistoa maila apaleko egitura bat da, eta ez da sasi tresnarik sortu behar Ipar Euskal Herriarentzat».

«Euskal parlamentariek egin lanaz asea naiz»

«Euskal parlamentarioek eraman lanaz izugarri ase naiz. Hiru aldaketa proposamenk onartu zituzten eta gainera oso ongi eraman dituzte Legebiltzarrera. Sindikatu Mistoari doakionez tresna juridiko bat da eta inportantea da begiratzea zein eduki ematen diogun. Orain arte dugun gobernantza moldeak jarraitu beharko du, hau da, Euskal Herriko lurralde kolektibitate, departamendu eta eskualdearekin harremanetan. Guk hasitako lana jarraitu eta hobetu nahi dugu. Hobetu nahi dugu, pixka bat gehiago instituzionalizatuz. Beraz, izango dituen eskumenei begiratzea da inportanteena».

«Autonomia behar dugu, herri bat garelako eta egitura hau delako eraginkorrena»

«Egiazko egitura instituzional bat behar dugu, eta hori Autonomia da. Onarpen politiko bat behar duen herri bat garelako eta egitura hau delako eraginkorrena. Gainera oroitarazi behar da egitura hauek bultzatuak direla Europa osoan. Ez naiz batere ados Sindikatu Mistoaren proposamenarekin. Erraitea Ipar Euskal Herriarentzat zerbait behar dela oso ongi, baina egitura honek eskumenak eta aurrekontu bat behar du. Hori demokrazia arau bat da, tokiko egiturek haien diru iturriak behar dituzte eta diru iturria ez bada tokikoa erantzukizun politikoa ez da osoa. Hain zuzen, udaletxe edota Kontseilu Orokorreko anitz ahal finantzario Parisetik dator».

«Asea naiz, horrelako egitura mota bat nahi ukan dudalako betidanik»

«Poulouk gure nahiari erantzun dio. Hiru egitura aukera ikertu genituen. Nik delegaturiko eskumenak lituzkeen erakunde bat nahi ukan dut betidanik. Beraz, asea naiz. Eskertzen dut Poulou, baita Jean Lassalle, Jean Grenet eta François Bayrou, gure parlamentari guztiek segitu gaituztelako. Sindikatu Mistoa aipatua izan den aukera bat da, orain guri dagokigu honen eraikitzea. Herri kolektibitateen, departamenduaren eta eskualdearen onespena behar da. Zeren argi da nik ez dudala onartuko Sindikatu Misto bat sortzea, honen baitan ez badira gure finantzaile nagusiak (departamendu eta eskualdea) kausitzen».

«Zein eskumen behar ditugun eztabaidatzeko eta argitzeko elkar bildu behar dugu»

«Baieztatzen da azkenaldi hauetan edozein alderdi politikoetako agintariak, edozein aktore sozial zein politiko, denak ados direla errateko Euskal Herriak behar duela tokiko beharrei erantzungo duen egitura instituzional bat. Konstatozio hau denek berdin egiten dugu. Abertzaleok Euskal Herriaren ezagupena ere behar dela gehitzen dugu eta hori aldarrikatzen dugu. Euskal Herria 2010, Euskal Herria 2020... badu aspaldi Euskal Herri honetan, Pays kontratuak egiten direla eta Sindikatu Mistoa horrelako beste neurri bat besterik ez da. Bere aldera doa, eta ez du batere argitzen zein mailetan gobernu tresnak emanen dituen. Gure irudiko biziki inportantea da elkar biltzea. Elkar bildu gaitezen, denok koordinatu gaitezen funtsezko gaia aipatzeko: zein eskumen behar ditugun argitu behar da. Hori da egiazko eztabaida, denok elkarrekin eztabaidatu behar duguna».

 

«Poulou jarrera defentsiboan da, orain arte daukaguna mantendu nahi du»

Bi politika daude bizian: defentsiboa eta ofentsiboa. Poulou defentsiboan da, orain arte duguna mantendu nahi du. Gu EAJn borrokan gaude urrunago eramateko, egoera alda dadin; hor oraina mantentzen da: Pays egitura, Hitzarmenak, Garapen eta Hautetsien Kontseiluak mantendu behar dira. Bai, egia erreforma honekin daukaguna arriskuan dela. Baina... Larriena da Frantziak eta tokiko hautetsi handiak ez direla biharko Euskal Herria eraikitzen saiatzen. Sindikatu Mistoa kapelu batetik atera dute; ez da tokiko hautetsi handietarik heldu ez, ezta ere erreforma hau landu duten pertsonetarik. Zein egitura eta zein eskumen behar den gogoetatu behar da. Gaur egun ez dakigu deus».

Jenofa Berhokoirigoin.

Baiona

 

www.berria.info