Prefetak auzapezei eskatu die Batera-ren herri kontsultaren antolaketan ez parte hartzeko

 

Frantziako Gobernuaren Pirineo Atlantikoetako ordezkariak urtarrilaren 22an auzapezei bidalitako gutuna «libertizida» da, Batera plataformaren iritziz. Adierazteko, elkartzeko eta elkarteak eratzeko askatasunak errespetatuak ez direla dio Baionako hautetsi eta jurista Jean-Rene Etxegaraik. Philippe Rey prefetak auzapezei argiki eskatu die «herri kontsultaren antolaketan ez parte hartzeko».

Eskutitz horri buruzko iritziak atzo plazaratu zituzten plataformako kideek, baita hainbat hautetsik ere. Argudio juridikoak eta politikoak aurkeztu zituzten.

Ezin onartuzko gutuna

«Ezin onartuzko gutuna» dela ohartarazi du Etxegaraik. Oroz gainetik, «konstituzioan idatzitako askatasunak ez dituelako errespetatzen». Hau da, kontsultaren antolaketa debekatuz funtsezko askatasuna urratzen duela ohartarazi du juristak. Egitasmoa juridikoki ikertu dutela eta horren antolatzea posible dela azaldu du Etxegaraik. «Ulertzen ez duenarena egiten du prefetak», Etxegarairen iritziz. Hau da, gutunean dio galdeketa auzapezek dutela antolatzen. Hau ez dela egia erantzun du. Eskualdeetako hauteskundeen egunean egingo den herri galdeketaren «antolatzaile bakarra Batera plataforma» dela errepikatu dute, eta oroitarazi du auzapezek hori sostenga edo lagun dezaketela. Prefetak dio auzapezek ezin dutela «gela, materiala eta jendeen laguntza prestatu». Hori ere, juridikoki ez dela egia zehaztu du Etxegaraik.

Egitasmoa Martinikan eta Guyanan egindako erreferendumarekin konparatuz, prefetak «nahasketa» sortarazten duela dio. Bien nahastea ez dela sekula Batera-ren nahia izan esan du.

«Hautetsiez trufatzen» dela dio Etxegaraik. Hau da, antolaketan parte hartzea debekatuz, deszentralizazioaren gainetik doala dio.

Horrez gain, prefetak «diskurtsoa egoeraren arabera aldatzen» duela dio Batera-k. Hau da, izan AHTari buruzko, postaren pribatizazioari buruzko edo ezagupen instituzionalari buruzko herri galdeketei buruz ez duela ikusmolde bera ohartarazi du. Haien egitasmoari buruz «zapuzkeria eta herra» duela dio plataformak.

Beldurra sortzea helburu

«Nahasketa eta beldurra sortaraztea» da prefetaren helburua, Jakes Bortairu Batera-ko kideak azaldu duenez. «Urduritasuna ez da gure aldetik, urduritasuna Frantziako Estatuaren aldetik da» jarraitu du. Horrez gain, «jendea izuaraztea duela helburu» dio Sauveur Baxok, Arberatzeko auzapezak (Baxenabarre). Baina atzo zeuden hautetsiek argiki diote beldurrik ez dutela. Hori dela eta, jakinarazi dute hautetsiei egitasmo horren berri ematen jarraituko dutela. Horren harira, auzapezen biltzarreko administrazio kontseiluko kideak oroitarazi du urtarrilaren 14an herri galdeketa sostengatzeko mozioa bozkatu dutela aho batez. «Hautetsiei nahi diegu erran lasaiki laguntza ematen ahal dutela» zehaztu du.

Batera-k «hautetsiek adierazitako legitimitatea» duela gehitu du Christine Bessonart auzapezen biltzarreko presidenteak. Hau da, 2005eko urrian Ipar Euskal Herriko auzapezen %64k herri galdeketaren alde agertu ziren. Hain zuzen, Ipar Euskal Herriko ezagupen instituzionalari buruz galdekatua izatea aspaldiko eskakizuna da. Hori dela eta, «ez dugulako lortzen antolatzen dugu!», ohartarazi du Martine Bisauta Baionako hautetsiak.

Ikusirik erantzun falta, «Frantziako Estatua urduri dagoela» segur da Batera plataforma.

Martxoan iragango diren eskualdeetako hauteskundeen egunean Batera-k herri kontsultak antolatuko ditu. «Euskal lurralde elkargo baten sortzearen alde zira?» galdera egingo dute herritar hautesleei. Datorren astean jakingo da zehazki zenbat herritan eta nola antolatuko den kontsulta.

Jenofa Berhokoirigoin

http://www.berria.info/